Vhuthihi ha kereke vhu khwathisa vhutanzi ha kereke kha shango/The unity and fellowship of the church strengths her task of being the witness of the gospel.

Tshililo Liphadzi

Tshililo's Bible Study

Acts • Sermon • Submitted 3 years ago

Acts 4:32–37

Generosity

0 ratings

· 17 views

Fellowship among christians is essential for our witness work

Notes

Transcript

1. Introduction

Vhuthihi vhukati ha vhathu vhu na zwivhuya zwinzhi zwine ha disa kha vhutshilo ha vhathu. Hone vhuthihi a si tshithu tshi leluwa u tshi swikelela na hune vhathu vha vha vho mama damu lithihi. Matumba a mita, a kereke na a lushaka mudzi wao ndi u shaea ha vhuthihi vhukati ha vhathu. Zwinwe zwine vhabebi vha shaya u zwi vhona vhukati ha vhana vhavho ndi vhuthihi havho vhune ha disa lukuna kha vhutshilo ha muta.

Vho Gabriel Tshindane vho nwala tshirendo kha bugu yavho ya Vhurendi ine ya pfi: Na rine ri vhathu. Tshirendo tshe vha nwala thoho yatsho i pfi: Zwino ndi hone ro fara gondo la u ya luwani. Vho nwala tshirendo hetshi nga 2012 vho sedza zwe zwa vha zwi khou itea nga ngomu ha lihoro livhusi la ANC. Phara ya u thoma ya itshi tshirendo i ri:

Vhone vha ri uyu mukovholano wa maipfi dzanganoni u do guma lini? Uyu mukovholano wa maipfi dzanganoni u do guma nga mini? Nnyi na nnyi a wana luvhande mabvahanwani awe ha vhi a no difha. Ho dala mupomokano wa uri munwe ha ngo luga. Ho dala musumbano wa uri uyu ha i ti zwone. Zwauri ri dzule fhasi ri tou amba namusi ndi muila. Ra ralo u isa phanda na u dodzana matope. Hone muvhuya vhukati hashu kha rothe a mbo shaea.

Maipfi e vha a shumisa: mukovholano, mupomokano, musumbano, u dodzana matope, ndi maipfi a dzumbululaho u sa vha hone ha vhuthihi zwine zwa disa zwine ra khou tanziela namusi hune vhana vha khotsi vha si tsha thukhulelana thoho ya nzie.

Tshipida tshe ra vhala namusi tshi khou amba na rine nga ha zwithu zwe zwa vhulunga kereke ya Vhaapostola vhukati ha vhutungu ha u tovholwa nga vhotshifhe vhahulwane na vhahulwane vha lushaka. A si thabelo fhedzi ye ya vha farisa u tshila kha hei nzulele, vho fariswa na nga kutshilele kwavho ku dzumbululaho na u lilela havho vhuthihi havho. Hune ha vha na vhuthihi ndi he Mudzimu a laedza hone mashudu na vhutshilo vhu sa fheliho (Ps.133). Vhutanzi ha kereke kha shnago vhu khwathiswa na nga vhuthihi hayo. Hune kereke i si lilele vhuthihi hayo a ri koni u amba nga ha vhumatshelo hayo.

Rine vhane ra ri ri kereke ya Mune washu nga tshifhinga tshine ra khou tshila khatsho, ndi mini zwine ra khou tanziela vhukati hashu? Hu na vhuthihi na ha ndivho ya zwe ra vhidzelwa zwone? Hu na vhuthihi na kha u shuma hashu zwe ra vhidzelwa zwone. Aya maipfi a Vhaefesa 4:1-3 ri khou a thetshelesa ha ni ane a ri: Tshilani nga ndil ine ya dzumbulula uri no vhidzwa nga Mudzimu…nu fungelele u dzula ni vhathihi.

2. Vhuthihi ha kereke ndi mutshelo wa Muya Mukhethwa vhutshiloni ha vhatendi/Unity is the fruit of the Holy Spirit in the Christian’s life.

Hetshi tshipida tshe ra vhala naho tsho ima nga tshothe tshi na vhukwamani na tshipida tsho fhiraho (vv.23-31). Tshipida hetshi tsha vv.23-31 tshe ra pfa nga ndila ye vha vhaapostola vha fhindula ngayo mishushedzo ya vhahulwane vha lushaka. Vho rabela. Kha v. 31 hu ambiwa nga ha zwithu zwiraru zwo iteaho musi vho fhedza u rabela: 1. He vha vha vho kuvhangana hone ho dzinginyea, 2. Vho dala Muya Mukhethwa, 3. Vha amba Ipfi la Mudzimu vha sa ofhi tshithu. Hetshi tsha u fhedzisela ri nga tshi kwamanya na v.33 ine ya ri: Vhaapostola vha tanziela vhe na maanda mahulu uri Yesu Mune washu o vuwa… Hezwi ndi zwone zwithu zwihulwane zwe vha sielwa zwone fhano shangoni (1:22). Vho bvela phanda na u sa thetshelesa u shushedzwa nga vha khoro ya Sanhedrini, vha tanziela vhe na maanda mahulu. Mudzimu o pfa zwe vha humbela uri a vha fhe mbilutshinna kha mushumo wa u vha thanzi dzawe. Mudzimu a bvela phanda na u vha anzela mashudu (v.33). A vho ngo zwi kona nga nungo dzavho, ndi zwe Mudzimu a vha fha zwone nga tshilidzi tshawe. Mudzimu u a fhindula zwine vhana vhawe vha mu lilela uri vha kone u shuma zwe vha vhidzelwa zwone. Mudzimu u a farisa vhana vhawe nga u vha tutuwedza nga maanda a Muya Mukhethwa uri zwe vha vhidzelwa zwone zwi si wele fhasi. Ndi zwithu zwine ra fanela u zwi vhala zwa disa phumudzo kha rine uri naho hu na mukovholano, musumbano, u dodzana matope, Mudzimu ha litshi u lamulela vhana vhawe vha mu vhidzelelaho. Ndi lone pfumo la kereke na vhukati ha nzulele dzi lemelaho kha vhutshilo ha kereke. Vhone vha khou fhindula ha ni nzulele mutani wavho, kerekeni na shangoni? Vha khou ya na vha lila kha Mudzimu, kana vha khou vhea zwithu zwandani zwavho, vha dzhena kha mukovholano na musumbano?

Luka u dovha a ri dzumbululela zwine zwa vhonala musi vhathu vhe na Muya wa Mudzimu. A zwi gumi nga maipfi a mulomo, zwi vhonala na nga nyito. A si vhutanzi ha mulomo fhedzi zwi vhonala na nga u shumelana. Hune ha vha na Muya wa Mudzimu a ri vhoni fhedzi vhathu vhane vha vha na passion ya vhurumiwa fhedzi, vha a funa na muta wa kereke. Hezwi zwine Luka a khou ombedzela sa zwone zwi dzumbululaho u vha hone ha Muya Mukhethwa kha kereke, ndi zwe zwa vhonala musi Muya Mukhethwa a tshi da (2:42-47). Hezwi zwine a khou amba hafha ndi thalutshedzo ya vhuvhili hu u khwathisa zwine zwa vhonala hune ha vha na Muya Mukhethwa. Zwe Muya Mukhethwa a bveledza khavho ndi u vha tshithu tshithihi, zwine zwa talutshedzwa kha v.32 sa u dzula mbilu nthihi na muhumbulo u muthihi. U bva nga ngomu havho, kha muthu wa nga ngomu (inner person) vho vha vhe tshithu tshithihi. Zwe vha vha vha tshililela zwone (ndivho) zwo vha zwi tshithu tshithihi zwi tshi bva nga ngomu. A vho ngo vha vha ha nyathophi i totholaho nga nnda fhasi i tshi fhisa kana vho masea khole mbiluni zwi tshi vhavha. Vhuthihi havho ho vhonala nga lufuno lwe lwa swikelela kha u kovhana na ikonomi. Hezwi ndi mitshelo ya u vha hone ha Muya Mukhethwa kha vhutshilo ha kereke ane vha mu wana musi vho rembuluwa vha tanangedza u tshidzwa havho nga Yesu Kristo. Hune ha vha na u livha luwani he Vho Tshindane vha amba nga hao kha vhutshilo ha kereke, ri fanela u vhudzisa mafhungo madifha e vhathu vha a tanganedza. Ndi aya e vhanwe vho a tanganedza, vha dadzwa nga Muya Mukhethwa, vha vha na mbilu nthihi na muhumbulo muthihi.

Vhahashu, ndi mini zwi vhonalaho vhukati hashu sa kereke? Muya Mukhethwa u khou ri fha hetshi tshipida uri ri dilavhelese. Ri tshi dilavhelesa ri khou vhona ni? Hu na vhuthihi na ha ndivho kana ndi ndowelo ya u dzhena kereke?

3. Muya Mukhethwa u ri fhata kha vhutshilo ha u dikumedzela kha vhanwe hu si u sedza kha rine fhedzi/The Holy Spirit teaches us to be unselfish and to commit ourselves to one another’s life.

Vhuthihi he ha vha hone vhukati havho nga mulandu wa u dadzwa nga Muya Mukhethwa ho vhonala nga ndila ye vha lavhelesa ngayo thundu dzavho. Kha 2:44 hu pfi:… zwe munwe na munwe a vha e nazwo zwa didzula zwi zwa vhothe. Kha v.32b hu pfi:…hu si na uri tshanga ndi tshanga, tsha munwe ndi tsha munwe, zwothe zwi zwa vhothe. Hezwi a zwi faneli u talutshedzwa hu tshi nga vho vha vhe si tshe zwithu zwe vha vha vha tshi ri ndi zwavho sa muthu nga muthihi nga muthihi. Hone zwenezwo zwavho vho zwi vhona sa zwine zwa fanela u tika vhutshilo ha vhanwe hu si havho fhedzi. Nga ngomu havho ho vha ho tavhea muya wa uri zwe nne nda fara ndi zwa u fhindula vhushai na u sa kona hune murathu kana mukomana a vha khaho. A songo tambula nne ndo fara. U dadzwa nga Muya wa Mudzimu zwi a shandukisa kulavhelesele kwa thundu dzavho, tshelede yavho na zwifhiwa zwine vha vha nazwo. A vha tsha zwi lavhelesa vha guma kha vhone mune. Zwo no vha zwa u fhata vhuthihi hashu. Kha vhatendi vha divhaho Mudzimu nge vha rembuluwa hu vhonala hoku kulavhelesele.

Luka u bvela phanda na u ri sumbedza uri u dadzwa nga Muya Mukhethwa a zwi fheleli kha u vha na kulavhelesele/attitude fhedzi, zwi swika na kha u tenda u vha tshithavhelo/sacrificial action ndi tshi shumisa zwe nda fhiwa zwone. Ndi zwqe ra zwi vhala kha 2:45 hune ha pfi: vha tshi ita vha tshi rengisa masimu avho na thundu dzavho, vha tshi kovha nga hune vha vhona muthu a tshi lila ngaho. Ndi zwenezwi zwine ra guda kha v.34-35 hune ha pfi: Ho vha hu si na muthihi khavho ane a shaya, ngauri vhe vha vha vhe na masimu na dzinndu vho vha vha tshi zwi rengisa, vha nea vhaapostola tshelede yazwo, ya konou kovhelwa munwe na munwe nga hune a shaya. Ndi hoku kutshilele kwe kwa vhonala kha kereke hei ye ya dadzwa nga Muya wa Mudzimu. Vho vha zwithavhelo nga thundu dze vha vha vhe nadzo. A vho ngo tou fha zwe vha lavhelelwa u fha, vho fha vha fhirisa zwi tshi bva mbiluni dzavho dzi tutuwedziwaho nga Muya wa Mudzimu. Vho zwi ita tshifhinga tshothe vha tshi fhindula thodea dzine dza vha hone vhukati havho. Mudzimu u lavhelela hoku kutshilele kwa u vha zwithavhelo na kha vhone sa nwana wa Mudzimu. Ndi zwone na zwine vhone vha dzumbulula u vha na Muya wa Mudzimu? Ndi vhathu de vho vha tingaho mutani wa havho?

Tshinwe tshithu tsha vhuraru tshine Luka a khou ri humbudza ndi zwauri zwifhiwa hezwi zwe vha nekedza zwo fhindula thodea dze dza vha dzi hone. ndi ngazwo hu tshi pfi: Ho vha u si na muthihi khavho ane a shaya… u thetshelesa hezwi namusi ra lavhelesa vhutshilo hashu, ri fanela u pfa vhutungu, ri fanela u shona. Zwi do vha zwa vhudi arali ri tshi rembuluwa. Havha vhatendi vho fha zwothe zwi tshi bva mbiluni, vha songo sedza vhone vhane fhedzi, vho sedza vhanwe. Rine namusi a ri tou lilela fhedzi u kumbela rine vhane, u sedza kha rine vhane fhedzi, ri swika na hune ra fhura vhanwe zwo fanelaho. Ri fhura vhashai na zwo vha fanelaho sa fhethu ha u dzula/shango, madi, muya ri tshi pfumisa nyemulo dzashu. Vha si na tshavho vha na vhuimo de mitani yashu, kerekeni dzashu na kha lusaka lwa hashu? Hune ra vha hone ri vhona mini? Hu na zwiga na zwi dzumbululaho u dadzwa hashu nga Muya Mukhethwa?

Vhahashu hovhu ndi vhutshilo vhune kereke ya vhidzelwa khaho vhune ha tea u talula vhutshilo hashu sa vhatendi. A si khetho ine muthu a nga ita nga u funa hawe, ndi vhutshilo vhune ha ri vhofha, ha vho hone ndivho ya u tshila hashu. Hohu u fungelela kha hovhu vhutshilo ha u nea zwo fhatwa na u elekanya zwe Mune washu Yesu Kristo a ri itela. Kha 2 Vhakorinta 8:9 hu pfi: Vhuthu ha Mune washu Yesu Kristio na inwi na inwi ni a vhu divha: Naho o vha e mupfumi o vha mushai a tshi itela inwi, uri nga vhushai hawe inwi ni pfume. U nea hashu na u vhavhalela vhanwe a zwi bvi kha u dala ha thundu dzashu, zwi bva kha u elekanya u tshidzwa hashu. yesu o nekedza vhutshilo hawe, o vha tshithavhelo ra kona u vha zwine ra vha zwone. Ndi kwone kutshilele kune kwa fanela u vhonala kha rine arali ri tshi do fhata mita, kereke na lushaka lwa hashu. Kha 1 Yohane 3:16-17 hu pfi: Zwine ra divha ngazwo uri lufuno ndi mini asizwi:Kristo o kumedza vhutshilo hawe lufuni a tshi itela rine, izwo na rine ri fanela u itelana zwenezwo. Edzonu pfa: arali muthu e na ludzula, a vhona mutendi ngae a tshi shaya, a si mu khathutshele mbilu, ndi lwone lufuno lwa Mudzimu naa? Ndavhelelo ya Mudzimu kha rine sa vhana vhawe ndi u tshila ri tshi edza mbilu ya u fhata nga u diita zwithavhelo hu si u namela. Tseda ndi zwina lihulu la vhutshilo, a huna zwine ya fhata, i tou pwasha. Muhuweleli a tshi amba uri: Ndo vhona tshi tungufhadzaho fhano fhasi ha duvha: Muthu u dikuvhanganyela lupfumo ha vha u ditodela mafhanza, ha da khombo lupfumo lwa balangana, a fhedza ga u sala a si na tshe a siela nwana wawe (5:13). Hu na mashudu hune vhathu vha tshila vha tshi diita zwithavhelo vha tshi itela Mudzimu na vhanwe. Kha Maleaxi 3:10, Mudzimu u ri: Disani tshafumi tshothe nduni ya u vhulungela uri nduni yanga hu vhe na zwiliwa. Nne Yahavee Mulangazwothe ndi ri: Nndingeni nga zwenezwo; ngoho ndi do vula minango ya tadulu nda tou ni nisela mashudu. Muvhuya ha nga lali na ndala (Psamm 37:25-26).

Ndi kwone kutshilele kune ra fanela u lilela u vhonala hakwo vhukati hashu. Ndi zwone zwine ra khou humbudzwa haya maipfi.

3. Vhutshilo ha vhuthihi ha vhatendi a si ha u tou kombetshedzwa ndi vhune ha bva mbiluni dzi zwi funaho/Unity among Christians should flow from loving hearts, not to be forced from outside.

Vhanwe vha tshi vhala hetshi tshipida vha ri zwo vha zwo tou fanela kha vhakriste u tshila nga hei ndila nga mulandu wa uri vho vha vha khou lavhelela u vhuya ha Mune wavho nga u tavhanya. Ndi zwithu zwe zwa tou kombetshedziwa khavho u bva nga nnda. Hone a ri na na vhutanzi na vhuthihi u bva kha tshipida tshe ra vhala uri zwo vha zwo ralo. Zwine zwa vha khagala ndi zwauri zwo bva nga ngomu havho, vhazwi ita vha tshi zwi funa nge vha vha vo dala Muya Mukhethwa. A si vhutshilo vhune ra nga itelwa hone ngatshinwe tshithu tshi bvaho nga nnda hashu. ndi vhutshilo vhu fhatiwaho u bva nga ngomu hashu musi mbilu dzashu dzo tanganedza Ipfi la Mudzimu, Muya Mukhethwa a li sikitedza nga ngomu hashu. U vhavhalelana zwi bva kha mushumo wo shumiwaho mbiluni dzashu. Ndi mushumo wa thembuluwo ro thetshelesa Ipfi la Mudzimu. U nea na u shumela Mudzimu nga thundu dzashu a si zwithu zwi daho kha rine naturally, ndi muya une wa tea u fhatiwa nga u thetshelesa Ipfi la Mudzimu. U funzwa zwavhudi Ipfi la Mudzimu ndi tshone tshisima tsha u nea. Hune vhathu vha si nee kana vha vha na vhutshivha, vha tshila vha tshi tswa ri fanela u sedza pulpit dzashu.

Hune kereke ya funzwa zwavhudi, i si itele tshikhuna Ipfi la Mudzimu, ya dadzwa nga Muya wa Mudzimu i do tshila i tshin lilela u nga kereke hei ya Vhaapostola, i tshi edzisela u vhavhalela hayo vhashai na u nea ri tshi zwi funa na u diita zwithavhelo nga mulandu wa mushumo wa Muya Mukhethwa. Zwinwe zwine ra tea u zwi divha sa kereke ndi zwauri mafhungo a muvhuso wa Mudzimu ndi mafhungo madifha kha vhashai. Ndi mafhungo ane a vha disela u luga (justice) na u tshidzwa havho (salvation). Ndi zwone zwine ra ri zwine vhathu ha zwi shaya, zwi fhindulaho thodea khulwane ya vhathu ndi holu lufuno lwe Mudzi u a ri itela nga Kristo. Ndi lwone lufuno lune nne na vhone ra vha thanzi dzalwo vhukati ha heli shango. Ri fanela u dzumbulula fulufhelo lashu nga u funza na nga u tshila ri tshi adza vhutshilo hashu ri tshi itela vhanwe. Ndi nga ni namusi ri tshi vho tshila sa vhatendi vhane vha nga vho tou kombetshedzwa u vha kereke ya Mudzimu hune na u nea ra fanela u tou luvhelelwa? A zwi faneli u tou ralo ri fanela u zwi ita ri tshi zwi funa zwi tshi bva mbiluni dzashu.

5. Mafhedziselo.

Vhahashu, Mudzimu o ri kumedza mushumo wa u vha thanzi dza Mafhungo madifha kha heli shango. Mafhungo madifha e ra hwala one a si ane a tea u vhonala nga maipfi fhedzi, a fanela u vhonala na nga vhutshilo hashu ha u vha zwithavhelo ri tshi edza Mune washu. U vha thanzi dza mafhungho madifha zwi ri vhea kha vhuimo ha u disa mutakalo, u luga kha vhutshilo ha vhathu. A ri nga vhi kereke Afurika Tshipembe ri si vhe vhutunguni nga luwa luhulu lune lwa vha hone vhukati ha vhashai na vhapfumi, vhukati ha zwitshavha zwa hashu. A ri nga vhi vhatendi kerekeni dzine dza kundelwa u vhavhalela vhafunzi vhadzo, dza u kundelwa u ita vhurumiwa, dza u kundelwa u fhata zwiimiswa zwi fhataho vhutshilo ha vhathu rine ri kha tseda.

Kha ri dilavhelese nga vhutshilo ha hei kereke ya u thoma, ri vhe vhafhumudzi sa Barnabasi, vhanwe vha tshile nga zwifhiwa zwe Mudzimu a vhea zwandani zwashu. Vhone vha vhona ha ni zwe Mudzimu a vhea zwandani zwavho.

Related Media

Related Sermons